Yamaha

Modus Anyar: Maling Munding Mundingna Dipeuncit Harita di TKP, Dicokot Dagingna

  Kamis, 22 April 2021   Irpan Wahab Muslim
Sesa potongan daging munding.

TARAJU, AYOTASIK.COM -- Maling munding atawa sapi ditungtun tina kandangna atawa tuluy diangkut ku mobil geus biasa. Tapi, maling munding nu mundingna harita dipeuncit di Tempat Kajadian Perkara (TKP), tuluy dicokot dagingna, asa kakara ngadangu.

Kitu pisan nu dialaman ku Haji Fatah warga Kampung Warung Rungkat, Desa Banyuasih, Kecamatan Taraju, Kabupaten Tasikmalaya, Senén 19 April 2021, kira-kira tabuh hiji tengah peuting.

Haji Fatah boga munding tilu nu kabéhna diurus ku Wawan warga Kampung Perkebunan Téh atawa ACD di Desa Banyuasih, Kecamatan Taraju.

Ceuk Kapolsek Taraju IPTU Agus Irianto, Rebo, 21 April 2021, “Haji Fatah boga munding tilu. Nu dipalingna ngan hiji. Malingna meuncit munding harita kénéh di TKP. Tuluy sababaraha bagéan dagingna dicokot. Daging pingping jeung opat sukuna dicokot. Nu ditinggalkeun tulang awak jeung huluna wungkul.”

Tina hasil olah TKP, aya sababaraha barang bukti nu diamankeun ku pulisi, nyaéta bagéan tulang awak munding nu teu dibawa, jeung dua péso seukeut nu masih aya getihan kénéh.

Salain éta, ceuk Agus, diamankeun ogé batu asahan, dua plastik gedé, hiji karung goni warna bodas, jeung tali tambang warna konéng jeung héjo urut nalian munding saméméh dipencit.

Hulu munding jeung sabagéan daging jeung tulang munding kapanggih ku warga di tempat wisata perkebunan teh ACD PT Sambawa.

Kapolsek Taraju IPTU Agus Irianto nétélakeun tindak pidana maling munding ieu kalawan maké modus anyar meuncit munding di TKP geus ngaresahkeun warga, utamana warga nu boga sasatoan.

Nepi ka ayeuna kasus ieu masih aya dina penyelidikan Mako Polsek Taraju.

  Tags Terkait

   Ayo Bagikan!
Ayo Respon
   Komentar

Komentar sepenuhnya menjadi tanggung jawab pribadi seperti diatur dalam UU ITE

Komentar