Anthony Ginting Siap Makalangan di Olimpiade Tokyo 2020

  Rabu, 21 Juli 2021   Redaksi Ayotasik.com
Anthony Ginting. (Wikimedia Commons/Fauziananta (CC)

TOKYO, AYOTASIK.COM – Salah sahiji atlit wawakil Indonésa di Olimpiade Tokyo 2020 asal Cimahi, Anthony Sinisuka Ginting, nyebutkeun siap makalangan di pésta olahraga saalam dunya ieu. Ginting rék fokus ngajajal lawan-lawanna di grup J.

Di grup J, Ginting--nu kakoncara boga tehnik tipuan nu matak lawan sebér—bakal meunang tangtangan Gergely Krausz ti Hungaria jeung Sergey Sirant ti Rusia. Dina anceran mah, Ginting nu jadi unggulan kalima di Olimpiade ieu, bakal sanggup ngeléhkeun lawan-lawanna. Sanajan kitu, Ginting moal nganggap énténg.

Sakali gé Ginting can pernah panggih jeung dua lawanna éta. Tapi, sacara paringkat mah, Ginting jauh saluhureun. Paringkat Ginting mah ka-5, sedengkeun Krausz paringkat ka-94, Sirant ka-77.

Gedé hareupan Ginting maju ka “babak 16 besar” atawa babak knock-out. Najan kitu, Ginting moal waka mikiran ka dinya. "Rék fokus jeung maén maksimal wé dina satiap pertandingan. Kajeun teuing, saha lawanna," ceuk Ginting, Minggu 18 Juli 2021.

Pamain asal kleub SGS ieu téh rék waspada dina satiap pertandingan fase grup. "Ieu mah aréna olimpiade. Sagala rupa bisa kajadian. Tong boro di olimpiade, di turnamén biasa gé pamaén paringkat handap bisa ngéléhkeun saluhureunna," ceuk Ginting.

Ginting nétélakeun, kiwari “persaingan” di tunggal putra beuki ramé. Kakuatan satiap pamaén ampir rata. "Komo deui mun geus asup di babak knock-out. Pamaén unggulan bakal panggih jeung unggulan. Jadi, ceuk kuring mah, saha nu pangsiapna--jeung teu leungit fokus--manéhna nu bakal meunang."

Geus saminggu Ginting Latihan di Kumamoto, Jepang. Di Kumamoto, sagala fasilitas aya. Di dieu sagala kasiapan dilakukeun. Ti mimti tempat istirahat, dahareun, jeung sagala kalengkepan latihan, bari tetep maké protokol kaséhatan. "Garareunah bisa latihan di dieu. Suasana béda. Leuwih ngamotipasi," ceuk Ginting.

Senén, 19 Juli 2021, tim Merah Putih dijadwalkeun ngajugjug Tokyo pikeun ngalakukeun sagala rupa saméméh derna Olimpiade 2020 Tokyo ti tanggal 23 Juli nepi ka 8 Agustus 2021.

  Tags Terkait

   Ayo Bagikan!
Ayo Respon
   Komentar

Komentar sepenuhnya menjadi tanggung jawab pribadi seperti diatur dalam UU ITE

Komentar